Bo día a todos e todas,

En primeiro lugar quero amosar o meu agradecemento a todos os medios aquí presentes e tamén ós que por distintos motivos non puideron estar, pero que sí publicitarán este acto de presentación e con elo tamén á propia Feira.

É un auténtico privilexio para min dirixirme un ano máis a todos vós para presentar a 25ª edición da Feira do Queixo e Pan de Ousá de Friol, que se celebrará o vindeiro domingo 26 de Marzo.

Aló polo ano 1993 o meu predecesor no cargo, Antonio Muíña, iniciaba esta andadura; e desde as derradeiras eleccións municipais son eu quen teño a responsabilidade de continuar con este importante evento, tratando de melloralo e adaptalo aos novos tempos sen que perda a súa esencia de tradición e calidade.

Unha data marcada no calendario e que os veciños de Friol agardamos ansiosos desde hai un ano para volver gozar da infinidade de propostas variadas e de calidade que ofrece esta Feira. Unha Feira de recoñecido prestixio que consegue duplicar e mesmo triplicar a nosa poboación durante a súa celebración, actuando como o maior polo de atracción de visitantes co que contamos no noso Municipio.

A nosa feira é un gran escaparate gastronómico e tamén turístico, unha das principais sinais de identidade como friolenses e que axuda a dinamizar de maneira decisiva a actividade económica local, especialmente do sector primario. Sendo este o noso principal motor na actualidade, debemos contribuir á súa potenciación para que sexa o máis competitivo posible.

Este ano é especial, pois celebramos o 25 aniversario, e por iso lle adicaremos, por primeira vez na súa historia, dous días de festa. Creo que o temos merecido, e polo tanto intentarei que sexan intensos. Desde o Concello fixemos un esforzo económico extra para preparar un ambicioso programa de actividades pensando tanto nos veciños de Friol como nos visitantes, para que gocen ao máximo dunha Feira que brilla con luz propia.

1º Friulio Castrexo Romano

O vindeiro sábado 25, véspera da 25 edición da Feira do Queixo de Friol e Pan de Ousá, celebrarase o 1º Friulio en Friol, organizado pola Asociación de Recreación Histórica “A CASTRONELA”, e promovido por este Concello.

Será un encontro entre Asociacións Castrexas e Romanas vinculadas á recreación histórica, na que tamén colaboran as asociacións culturais que Friol ten por todo o municipio, como son “Carballo Vivo” da parroquia de Carballo, “Asociación de Condes”, “Asociación de Roimil” e “Xesta Verde”, ás cales agradezo a implicación que están a ter con esta celebración.

Durante esta xornada trátase de recrear os modos de vida, costumes e crenzas de ámbalas dúas culturas. Aquí estarán presentes Asociacións principalmente de Lugo, pero tamén doutras terras foráneas, como é o caso da asociación celtíbera “Tierra Quemada” de Soria.

As actividades previstas para a xornada van dende a recreación da vida nun castro, ata a elaboración do pan que utilizaban as milicias romanas nos seus desprazamentos, elaboración de queixo de Friol, pasando por desfiles, talleres de coiro, barro, fiado, gastronomía castrexa… sendo os actos mais importantes o asedio do castro e o enterro celtíbero.

Todas estas actividades levaranse a cabo íntegramente na vila de Friol: na Praza de España, parte da Rúa Santa Isabel e mais no paseo Fluvial do Río Narla, onde se asentarán un campamento Romano chamado Cidadela e un poboado castrexo chamado Castro. Durante o día, por distintos puntos da vila escoitarase música tradicional a cargo de varios grupos Folk.

Dende as 9 da noite tamén se amenizará con música tradicional a cargo dos grupos Gaia Pandereteiras, Trécolas, Tango en Xaneiro e Albariza, para rematar a noite co grupo Claxxón, que se prevé que remate a súa actuación entorno as 4 da madrugada, poñendo fin por tanto a este 1º Friulio do Concello de Friol.

Quero ter unha mención moi especial en forma de agradecemento para todos os membros que compoñen a Asociación A Castronela: Grazas pola vosa implicación, polo esforzo e moitas grazas pola labor que nos últimos tempos estades a desempeñar.

25 Feira do Queixo de Friol e Pan de Ousá

E o domingo chega a nosa 25 edición da Feira do Queixo de Friol e Pan de Ousá. Unha Feira que crece, modernízase e adáptase aos novos tempos pero sen perder a súa esencia. Trátase de facer later o corazón de Galicia, pois Friol, pola súa situación xeográfica, encádrase no centro da Comunidade Autónoma. O sábado 25 e especialmente o domingo 26 de marzo, os corazóns das xentes de toda Galicia e doutros lugares que se acheguen ao noso municipio, sentirán con ledicia o trato dos friolenses e o disfrute dos nosos produtos, como son o queixo e o pan.

O Queixo de Friol e o Pan de Ousá son dous produtos totalmente artesáns. Ambos están elaborados coas mellores materias primas de Friol e os dous produtos contan cun elemento moi importante e fundamental para conseguir a calidade pola que se caracterizan: que é o cariño co que as nosas queixeiras e os nosos panadeiros/as amosan no momento da súa elaboración.

E froito desta calidade coa que contan os nosos queixos e a difusión que dende o Concello se lle da a un dos produtos  mais importantes do noso Municipio, nesta próxima Feira preséntanse tamén novos productos gastronómicos baseados no queixo de Friol. A cadea Galipizza acaba de crear 2 novas pizzas e una hamburguesa na que empregará o noso queixo e outros produtos típicos de Friol, como o porco celta:

  • Galipizza de queixo afumado de Friol, con paleta de porco celta, espárragos trigueiros e ovos rotos de curral.
  • Galipizza 5 Queixos Galegos, con queixo de Friol, de Arzúa, San Simón, Cebreiro e Tetilla.
  • Hamburguesa de zorza de porco celta con queixo de Friol e mermelada de pementos de Padrón.

Galipizza é unha empresa de orixe tamén lucense, pois a súa base está en Viveiro, e que se creou no ano 1993, precisamente o mesmo ano no que botou a andar a nosa Feira. O lanzamento destes productos terá lugar durante a Feira deste ano. Aquí en Friol xa se poderán degustar, pois Galipizza tamén estará presente coa súa furgoneta especial para os eventos na rúa. E proximamente estes novos pratos poderanse degustar en tódolos locais que Galipizza ten en Galicia e Asturias, o cal vai suponer un gran escarapate comercial para o Queixo de Friol.

Tamén aproveitamos este 25 aniversario para crear a páxina web queixoepandefriol.gal, que creamos desde o Concello para presentar o programa deste ano e recordar imaxes das 24 edicións anteriores, con fotografías, vídeos, cartelería…

Para o próximo día 26 as calidades tanto dos queixos como do pan van ser excelentes, como ven sendo de costume ano tras ano. Así mo fixeron chegar xa os productores, e con iso xa aseguramos en parte que a Feira vai ser de novo un éxito. As previsións de participación de queixeiras e panadeiros coas que contamos son superiores ás de anos anteriores, pois contamos coa asistencia dunhas 95 queixeiras e 5 Panaderías de Ousá expoñendo os seus produtos. En canto ao volume de queixos, esperamos que tamén se incrementen. Segundo as estimacións coas que contamos, expoñeranse sobre uns 10.000 queixos, e estarán á venda unhas 3.500 pezas de pan.

Como é tradición, a Praza Andón Cebreiro acollerá unha gran carpa onde se exporán os dous produtos principais da Feira. Arredor desta instalación colocaremos stands onde se poderán mercar diferentes produtos agroalimentarios do Municipio, como poden ser carne, mel e ovos, entre outros. A carón da carpa principal tamén estará situado o stand municipal, onde a partires da 1 da tarde todos os asistentes  poderán degustar totalmente de balde os dous principais produtos acompañados dun viño.

Na Praza Rosalía de Castro o Concello tamén instalará stands destinados a exposición de produtos de diferentes sectores, como por exemplo artesanía, textil, venda de distintos tipos de viños, sidras, licores, etc. As rúas Diputación e Santa Isabel permanecerán pechadas ó tráfico, dado que estarán destinadas ó montaxe de pulperías e de tendas ambulantes, que non terán que pagar ningún tipo de tasa Municipal.

Ás 10 da mañá empezará a Feira co tradicional lanzamento de foguetes.

Ás 10 e media a organización asignará os stands ás queixeiras e panaderías que participarán na Feira.

Ás 11 e media está prevista a apertura da Feira co simbólico corte de cinta, que nesta ano correrá a cargo dunha queixeira.

Durante toda a mañá haberá actuacións de pasarrúas e charangas polas rúas do Concello. Este ano participarán a Xesta Verde de Friol, a Banda de Tambores “As Angustias” de Ferrol, a Charanga de Vilalba e os Charangos de Neda.

Nesta edición, como fixemos o ano pasado, continuamos coa programación durante a tarde.

Ás 6 e media contaremos cun Concerto Folk a cargo do Grupo AS ZOELAS, que terá lugar no salón de actos do Centro Sociocultural de Friol.

E por último, ás 10 da noite empezará a Romaría, que estará amenizada nesta edición pola orquestra PARÍS DE NOIA e polo grupo D´ZONA. Estas serán as últimas actuacións previstas nesta 25ª edicción da Feira do Queixo e Pan de Ousá, que rematará sobre ás 4 da madrugada.

Durante estes dous días contaremos cos membros da brigada de servizos e mantemento do Concello, así como tamén coa unidade de Protección Civil. Os membros da brigada do Concello adicaranse á organización dos stands e tamén a subsanar calquera tipo de contratempo que poida xurdir no transcurso deste días. Os membros de Protección Civil serán os encargados, xunto con membros da Garda Civil, de organizar e dirixir o tráfico. O día 26, debido á gran afluencia prevista de visitantes e coches,  habilitaremos as instalacións do Mercado Municipal como aparcadoiro, así como tamén as rúas do Polígono Industrial.

Un ano mais, Friol convertirase en perfecto anfitrión para todas aquelas persoas que nos visiten durante ese día, facendo gala da hospitalidade que nos caracteriza, para que a Feira de Friol siga sendo un lugar de referencia na nosa comunidade.

Dende o equipo de Goberno que eu presido, queremos facer un chamamento a todas aquelas persoas que aínda nunca nos visitaron no día da nosa Feira: Convídoas a que se acheguen o domingo 26 e coñezan o evento mais importante do noso Municipio, e probablemente de toda a provincia. Asegúrolles que lles merecerá a pena, e que non o esquecerán. Tamén quero lembrarlles ós visitantes de outros anos que repitan a experiencia vivida nas anteriores ediccións e que este día 26 volvan a vivilas de novo.

Un ano mais, o vindeiro domingo 26 de marzo FRIOL será a Capital Galega do Queixo e do Pan.

Desexo que este día sexa un éxito en todos os aspectos para a nosa Feira, para Friol e para todos os Friolenses.

Moitas grazas.

 

José Ángel Santos Sánchez

Alcalde de Friol