Queridos veciños e veciñas,

É unha verdadeira satisfacción para min dirixirme de novo a todos vós con motivo da celebración da nosa prestixiosa Feira do Queixo e Pan, dous produtos que con tanto orgullo festexamos no noso querido municipio de Friol.

Quero convidarvos a asistir o vindeiro domingo 20 de marzo á XXVIII edición da Feira do Queixo de Friol e Pan de Ousá, ese evento tan especial que nos leva identificando como lugar de referencia na nosa comunidade desde hai 30 anos.

As nosas vidas cambiaron moito desde que hai tres anos celebramos a anterior edición da feira, pero desde o Concello traballamos para poder ofrecer coma sempre un completo programa de actividades dentro dun marco seguro e respetando tódalas medidas de prevención e hixiene.

A nosa feira, o queixo e o pan seguirán sendo os nosos principais sinais de identidade como Friolenses, que unha vez máis exerceremos como perfectos anfitrións para tódalas persoas que nos visiten durante ese día, para que ninguén se sinta forasteiro na nosa terra.

Recibide un afectuoso saúdo e os meus mellores desexos para esta 28 edición.

José A. Santos Sánchez
Alcalde de Friol